У 1871 годзе з адкрыццём участка чыгункі Смаленск–Брэст з’явілася станцыя Баранавічы. Драўляны будынак вакзала, станцыйныя пабудовы і нешматлікія дамы чыгуначнікаў сталі пачаткам горада. Ішоў час, рос прыстанцыйны пасёлак, з’яўляліся вуліцы. Самая першая з іх доўгі час называлася Вакзальнай. Па гэтай дарозе можна было трапіць у мястэчка Новая Мыш, таму пазней яна стала насіць назву Навамышскі тракт і Навамышская, а ў час польскай улады – Каляёвая.
9 снежня 1964 года вуліцы было прысвоена імя Б. Б. Вільчкоўскага – удзельніка партызанскага руху ў Беларусі ў гады Вялікай Айчыннай вайны, Героя Сацыялістычнай працы. Нарадзіўся Багуслаў Багданавіч Вільчкоўскі 14 сакавіка 1928 года ў в. Пагулянка (цяпер Соргавічы) Баранавіцкага раёна. У гады Вялікай Айчыннай вайны ў 14-гадовым узросце быў сувязным і разведчыкам атрада імя Катоўскага партызанскай брыгады “25 год БССР”. Неаднаразова прымаў удзел у аперацыях па падрыву эшалонаў ворага і чыгуначных мастоў, у разгроме паліцэйскіх гарнізонаў.
Пасля вайны Б. Вільчкоўскі быў паляводам, брыгадзірам, членам праўлення калгаса “Іскра”. Жыў у в. Малая Сваротва. З 1959 года – старшыня калгаса “Іскра”, камуніст. Пад яго кіраўніцтвам адсталая сельгасарцель ператварылася ў моцную гаспадарку. У 1963 г. Б. Вільчкоўскага выбіраюць дэпутатам Вярхоўнага Савета БССР. Падчас выступлення на партыйным сходзе калгаса 27 лістапада 1964 г. Б. Б. Вільчкоўскі быў забіты. Пахаваны ў в. Соргавічы. 22 сакавіка 1966 года яму пасмяротна прысвоена званне Героя Сацыялістычнай Працы.
Вуліцу Б. Вільчкоўскага ўпрыгожвае чыгуначны вакзал Баранавічы-Цэнтральныя, пабудаваны ў 1957 годзе. Побач знаходзіцца Дыстанцыя грамадзянскіх збудаванняў.
Насупраць вакзала можна ўбачыць двухпавярховы будынак – першае цагельнае збудаванне горада. Першапачаткова гэта быў арэндны дом. Затым тут размяшчаліся: турма, інфекцыйная бальніца, розныя школы, краязнаўча-турыстычная база.
Далей па вуліцы знаходзіцца метэаралагічная станцыя. У канцы 60-х гадоў мінулага стагоддзя тут была авіяметэастанцыя пры баранавіцкім аэрапорце, дзе праводзіліся метэаназіранні для патрэб аэрапорта. Цяпер на месцы аэрапорта знаходзіцца жылая забудова. А метэастанцыя засталася. Тут вядуцца назіранні за надвор’ем, а дадзеныя перадаюцца ў Рэспубліканскі гідраметэацэнтр.
Сёння вуліца пачынаецца ад Мінскага пераезда, а заканчваецца на срыжаванні з вуліцай М. Даменікана і па-ранейшаму застаецца адной з важнейшых магістраляў горада.
