Уладзімір Мікалаевіч Карват

Вуліц, якія сведчаць аб асаблівым стаўленні жыхароў нашага горада да людзей, звязаўшых свой лёс з небам, у гісторыі Баранавіч было шмат.

Асобна сярод іх стаіць імя Уладзіміра Карвата — Першага Героя Беларусі.

Уладзімір Мікалаевіч  Карват нарадзіўся 28 лістапада 1958 года ў   г. Брэсце. У 1981 годзе закончыў Армавірскае вышэйшае ваенна-авіяцыйнае вучылішча лётчыкаў.  У 1981—1994 гадах  служыў у Хабараўскім краі. 3 1994 г. Карват  —  падпалкоўнік, ваенны лётчык першага класа, начальнік паветрана-агнявой і тактычнай падрыхтоўкі Баранавіцкай  61-й авіябазы.

 23 мая 1996 года У. М. Карват  выконваў палёт з адпрацоўкай прыёмаў паветранага бою на малых вышынях у складаных метэаўмовах. Самалёт загарэўся. Лётчык адвёў палаючую машыну ад вёсак Арабаўшчына і Вялікае Гацішча Баранавіцкага раёна, ратуючы  жыхароў, а сам загінуў. Пахаваны ў Брэсце.

          Званне Першага Героя Беларусі Уладзіміру Карвату прысвоена 21 лістапада 1996 года  (пасмяротна). На месцы падзення самалёта і ў вёсцы Арабаўшчына ўстаноўлены мемарыяльныя знакі, а на будынку СШ № 8 г. Брэста, дзе  вучыўся Уладзімір Мікалаевіч, — мемарыяльная дошка. Імем У.М. Карвата названы вуліцы ў Брэсце і в. Арабаўшчына. У Баранавічах, недалёка ад авіябазы, добраўпарадкаваны сквер імя     У. Карвата. А ў сакавіку 1997 года імя Героя ўвекавечана ў назве аднаго з бульвараў у Паўночным мікрараёне.

Вуліцы майго горада