Вуліца Брэсцкая
Старонка 1/2 
Заўсёды адрознівалася вялікай працягласцю, разнастайнасцю забудовы і звілістасцю. Адна з першых брукаваных вуліц. Спачатку яна называлася Іванаўскай. Пазней стала часткай шасэ Баранавічы-Беласток, пабудаванага ў 1900 – 1902 гг. і атрымала назву Шасейная, дзякуючы свайму выгляду і прызначэнню. Да сярэдзіны 1947 года яна праходзіла па сённяшняму Вакзальнаму праезду, па вуліцы Леніна (да швейнай фабрыкі) і далей па цяперашняй Брэсцкай вуліцы. Амаль да канца 1959 года вуліцу працягвалі называць Шасейнай, і толькі з сярэдзіны снежня 1959 года – Брэсцкай.
На вуліцы Брэсцкай ёсць будынкі, звязаныя з вехамі гісторыі горада. На перакрыжаванні з вуліцай Гагарына знаходзіцца міжшкольны вучэбна-вытворчы камбінат. Калісьці тут размяшчалася першая ў Баранавічах гімназія імя Т. Рэйтана. Недалёка ад гарадской бальніцы стаіць двухпавярховы домік з калонамі, у якім спачатку размяшчалася школа, пазней — дзіцячы садок, а ў апошні час – дзіцячая турыстычная станцыя. Значная частка цэнтральнай гарадской бальніцы і іншых медыцынскіх устаноў выходзіць на вуліцу Брэсцкую. Некалі тут знаходзіўся і будынак Баранавіцкай трыкатажнай фабрыкі, аднаго з буйнейшых прадпрыемстваў у горадзе.
На злучэнні з вуліцай Камсамольскай стаіць манумент у выглядзе дзяўчыны, вітаючай кожнага хлебам-соллю. Калісьці гэта была мяжа горада, але з цягам часу ў склад Баранавіч увайшла вёска Траццякі. Памеры горада павялічыліся, а разам з імі і працягласць вуліцы Брэсцкай.
У гонар воінаў-артылерыстаў у дзень 60-годдзя вызвалення горада Баранавічы ад нямецка-фашысцкіх захопнікаў у скверы на вуліцы Брэсцкай быў устаноўлены помнік у выглядзе палявой гарматы ЗІС-3. Гэта даніна павагі ад жыхароў горада.
Вось ужо 67 гадоў вядзе падрыхтоўку кадраў Баранавіцкі дзяржаўны прафесійны ліцэй будаўнікоў.
Сёння вуліца Брэсцкая – самая працяглая вуліца горада, дзе размешчаны разнастайныя аб'екты гандлю, грамадскія і медыцынскія ўстановы. Прывабліваюць сваім хараством сучасныя шматпавярховыя дамы, катэджы, акуратныя прыватныя домікі.
